អេហ្ស៊ីប៖ មេដឹកនាំក្រុមហាម៉ាស បានធ្វើដំណើរទស្សនកិច្ចមកកាន់ប្រទេសអេហ្ស៊ីបនៅថ្ងៃពុធ ទី២០ ខែធ្នូម្សិលមិញនេះ ខណៈគេមានក្ដីសង្ឃឹមថាអ៊ីស្រាអែល និងក្រុមសកម្មប្រយុទ្ធប៉ាឡេស្ទីនអាចនឹងឈានទៅរកកិច្ចព្រមព្រៀងឈប់បាញ់ និងការដោះលែងចំណាប់ខ្មាំងថ្មីមួយផ្សេងទៀតនៅក្នុងសង្គ្រាមតំបន់ហ្គាហ្សា។ នៅក្នុងសេចក្ដីថ្លែងការណ៍មួយបានឱ្យដឹងថា លោក Ismail Haniyeh ដែលបានធ្វើដំណើរមកកាន់រដ្ឋធានី Cairo ប្រទេសអេហ្ស៊ីប ក្នុងគោលបំណងចូលរួមពិភាក្សាអំពី "បញ្ហាដែលកំពុងក្ដៅគគុកនៅតំបន់ហ្គាហ្សា និងបញ្ហាប្រឈមធំៗមួយចំនួនទៀត"។
ប្រភពស្និទ្ធនឹងក្រុមនេះបានប្រាប់មកកាន់សារព័ត៌មាន AFP ថា លោក Ismail Haniyeh នឹងជួបជជែកការងារជាមួយប្រធានចារកម្មអេហ្ស៊ីបសម្រាប់ការពិភាក្សាស្តីពី "ការបញ្ឈប់ការឈ្លានពាន និងសង្រ្គាម ដើម្បីរៀបចំកិច្ចព្រមព្រៀងមួយសម្រាប់ការដោះលែងអ្នកទោស"។ ក្រៅពីជំនួបជាមួយប្រធានចារកម្មអេហ្ស៊ីប លោក Haniyeh ក៏នឹងជួបពិភាក្សាការងារជាមួយរដ្ឋមន្ត្រីការបរទេសអ៉ីរ៉ង់ Hossein Amir Abdollahian ផងដែរ។
នាយករដ្ឋមន្ត្រីអ៉ីស្រាអែលលោក Benjamin Netanyahu បានប្រាប់ក្រុមគ្រួសារចំណាប់ខ្មាំងកាលពីល្ងាចថ្ងៃអង្គារកន្លងទៅថា លោកបានបញ្ជូនប្រធានចារកម្មរបស់់អ៉ីស្រាអែលទៅកាន់ទ្វីបអឺរ៉ុបចំនួន ២ដងរួចមកហើយក្នុងកិច្ចខិតខំប្រឹងប្រែងដើម្បីរំដោះចំណាប់ខ្មាំងរបស់អ៉ីស្រាអែល។ លោកនាយករដ្ឋមន្ត្រីអ៉ីស្រាអែលបានប្រាប់ទៅកាន់សាច់ញាតិមួយចំនួននៃចំណាប់ខ្មាំងទាំង ១២៩នាក់ថា៖ "វាជាកាតព្វកិច្ចរបស់យើង ខ្ញុំទទួលខុសត្រូវចំពោះនាំឱ្យមានការដោះលែងចំណាប់ខ្មាំងទាំងអស់។ ការជួយសង្គ្រោះចំណាប់ខ្មាំងទាំងនេះ គឺជាកិច្ចការសំខាន់បំផុតរបស់យើង"។ គួរឱ្យដឹថា ចំណាប់ខ្មាំងទាំង ១២៩នាក់នោះ ត្រូវបានគេជឿថាកំពុងត្រូវបានឃុំខ្លួននៅតំបន់ហ្គាហ្សានៅឡើយ។
គេហទំព័រព័ត៌មានអាមេរិក Axios បានរាយការណ៍កាលពីថ្ងៃចន្ទថា ប្រធានចារកម្មរបស់អ៉ីស្រាអែល បានជួបជាមួយនាយក CIA លោក Bill Burns និងនាយករដ្ឋមន្ត្រីកាតា Sheikh Mohammed bin Abdulrahman Al Thani នៅអឺរ៉ុប។ កន្លងមក ប្រទេសកាតា ដែលគាំទ្រដោយអេហ្ស៊ីប និងសហរដ្ឋអាមេរិក បានក្លាយជាភ្នាក់ងារកណ្ដាលយ៉ាងសំខាន់ក្នុងការជំរុញឱ្យមានបទឈប់បាញ់រយៈពេលមួយសប្តាហ៍ និងការដោះដូរអ្នកទោសចំណាប់ខ្មាំងនៅក្នុងខែវិច្ឆិកា ដែលក្នុងនោះចំណាប់ខ្មាំងអ៉ីស្រាអែលចំនួន ៨០នាក់ត្រូវបានដោះលែង ជាថ្នូរនឹងអ្នកទោសប៉ាឡេស្ទីនចំនួន ២៤០នាក់។
គួររំឮកថា សង្រ្គាមបានចាប់ផ្តើមនៅពេលដែលពួកសកម្មប្រយុទ្ធហាម៉ាសបានផ្ទុះឡើងចេញពីតំបន់ហ្គាហ្សាកាលពីថ្ងៃទី០៧ ខែតុលាដោយបានសម្លាប់មនុស្សប្រហែល ១,១៤០នាក់នៅក្នុងប្រទេសអ៉ីស្រាអែល ដែលភាគច្រើនជាជនស៊ីវិល និងបានចាប់ចំណាប់ខ្មាំងបានប្រហែល ២៥០នាក់៕